هەواڵ- ڕاپۆرت
دوو بانکەکەی تەیف سامی چۆن و کەی دێنە هەرێم؟
دوو بانکەکەی تەیف سامی چۆن و کەی دێنە هەرێم؟
ئایا شوین بۆ بانکەکان دیاری کراوە و دابەشکردنی مووچەکە چۆن دەبێت؟
لە سلێمانی شوێنیان دیاریكردووە؟
پاش بانکە عێراقیەکان، هەژماری من چی لێدێت؟
دوا بەدوای بڕیارەکەی دادگای فیدراڵی بۆ بە نیشتمانی کردنی مووچەی فەرمانبەرانی هەرێمی کوردستان و تەوتینی مووچە لە بانکە حکومییەکانی عێراق لێدوانەکانی حکومەتی هەرێم لەبارەی کارکردن بە هەژماری من بەردەوامە و تا ئێستاشی لەگەڵ بێت حکومەتی هەرێم ,سورە لەسەر دابەشكردنی مووچە لە ڕێگەی هەژماری من و بانکە بازرگانییەكانی و تا ئێستاش رێکەوتن لەوبارەیەوە نەکراوە.لە لایەکی دیکەشەوە تەیف سامی، وەزیری دارایی عێراق دوو بانکی دیاریکردووە بۆ ئەوەی کە موچەی فەرمانبەرانی هەرێمی لێوە دابەشبکرێت کە ئەوانیش بانکەکانی رەشید و رافیدەینە لەو بارەیەوە سۆران عومەر ئەندامی ئەنجومەنی نوێنەرانی عێراق ،تایبەت بۆ کۆباس وتی، بەپێی نوسراوی تەیف سامی وەزیری دارایی عێراق کە بەناوی هەردوو بانکی رەشید و رافیدەین وەڵامی داوەتەوە لەبارەی پرۆسەی تەوتینی مووچەی فەرمانبەرانی هەرێم و ئاماژەی بەوەكردووە، دەست بە پڕۆسەی تەوتینی مووچەی فەرمانبەرانی هەرێم دەكرێت دوای ئەوەی وەزارەتی دارایی هەستا بە دابەشكردنی وەزارەتەكان بەسەر بانكی ڕەشید و ڕافیدەین. سەبارەت بەوەی ئایا دواکەوتنی تەوتینی مووچە بۆ مانگەکانی داهاتوو \ کێشە بۆ مووچە دروست ناکات، سۆران عومەر بۆ کۆباس ئاشکرایکرد، هیچ کێشەیەک دروست ناکات و تا ئەو کاتەی پرۆسەی تەوتین تەواو دەبێت ناردنی مووچە بەردەوامی دەبێت. بەپێی چەند سەرچاوەیەک لە رۆژانی داهاتوو لە هەندێک شوێن کردنەوەی هەژماری من بۆ فەرمانبەرانی هەرێم راگیراوە و لە هەندێک شوێنی دیکەش پرۆسەکە زۆر بە خاوی بەڕێوە دەچێت و ئەوەش وەکو ئاماژەیەک بۆ راگراتنی پرۆسەکە باس دەکرێت. بەڵام مەولود سابیر، بەڕێوەبەری بانکە بازرگانییەکانی هەرێمی کوردستان بۆ کۆباس دواو رەتیکردەوە هەژماری من راگیرا بێت و وتی: کردنەوەی هەژماری من بەردەوامی هەیە و ئاگاداریش نین لەوەی شوێن بۆ کردنەوەی لقی بانکەکانی رەشید و رافیدەین لە هەرێمی کوردستان دیاری کرابێت. بەپێی زانیارییەکانیش لە ئێستادا حکومەتی هەرێم داواکاری ئەوەیە بانکەکانی هەژماری من پەیوەست بکرێن بە بانکەکانی رەشیدو رافیدەین و مبەشێک بن لەو بانکانەی مووچەی لێوە دابەش دەکرێت و هەندێک بۆچوونیش هەیە بەوەی رێگری بکرێت لە پرۆسەی تەوتینی مووچە بۆ فەرمانبەرانی هەرێم. بەکر حەمەسدیق پەرلەمانتاری پێشووی ئەنجومەنی نوێنەران و پارێزەری مووچەی فەرمانبەرانی هەرێم کە سکاڵاکەی لە بەرژوەندی مووچەخۆران یەکلایی کردەوە بۆ کۆباس وتی، بەهیچ جۆرێک حکومەتی هەرێم ناتوانێت رێگری بکات لە پرۆسەی تەوتینی مووچەی فەرمانبەرانی هەرێم و پێم وایە لە چوار مانگی داهاتووش تەوتینی مووچەی فەرمانبەرانی هەرێم کۆتایی دێت چونکە پرۆسەکە وردەکاری زۆرە.
لەبارەی كردنەوەی لقی بانكەكانی رەشید و رافیدەین، د. نەرمین مەعروف ئەندامی لیژنەی دارایی لە ئەنجومەنی نوێنەرانی عێراق تایبەت بۆ كۆباس وتی، لقەکانی رافیدەین و رشید چەند جارێک هاتونەتە سلێمانی و هەولێر ئەویش بەمەبەستی كردنەوەی لقی خۆیان لە پارێزگاكانی هەرێم و بۆ ئەوەش لە سلێمانی شوێنیان دیاریکردووە و هەندێك رێکاری ئیداری ماوە جێبەجێ بكرێت.