هەواڵ- ڕاپۆرت

باراک ئۆباما،هەندێک نهێنی سەردەمانی حکومڕانی دەخاتە ڕوو

چۆن باسی کوردی کردووە؟

باس لە هەڵوێستێکی سەیری سەرۆکی هەڵبژێردراوی ئەمریکا دەکات

پۆتین بە بێ سۆز و مێرکل بە نەرم ناودەبات

سەرسام بووە بە هەندێک ڕەفتاری سەرکردە عەرەبیەکان

بە هۆی کتێبەکەی دەبێتە ملیۆنەر؟

(زەوى بەڵێندراو)، کتێبە نوێکەى باراک ئۆباما، ئەو کتێبەى پڕە لەنهێنى سیاسى و باس و خواسى گەرمى رۆژگارى سەرۆکایەتیەکەی.

کتێبەکەى باراک ئۆباما،لە ڕۆژی ١٧\١١\٢٠٢٠ بڵاوکرایەوە، دابەشدەبێت بەسەر دوو قۆناغى یادگەیدا، بەشى یەکەم، منداڵى و لاوییەتى ئەو کەسایەتییە لە خۆدەگرێت ، بەشى دووەمیشى زیاتر گرنگى داوە بەو هەشت ساڵەى سەرۆکایەتیکردنى ویلایەتە یەکگرتووەکانى ئەمریکا، لەنێوان ساڵانى 2009 بۆ 2017 . 
ئۆباما لەکتێبەکەیدا باسى چەندین سەرکردەی سیاسى رۆژهەلاتى ناوەڕاست و پادشا و سوڵتان و حاکمەکانى بەشێک لەوڵاتانى عەرەبى کردووە.
وێناى هەندێک لە سەرکردەکانى عەرەبى، بە دێز و نەخوازراو کردووە، لەوانەى ناوى هێناون (محەمەد حوسنى موبارەک ، محەمەد بن زاید و شاى پێشوى سعودیە) و چەندانى دیکە، لەبارەى سەرکردەکانى جیهان و سیاسییە ئەمریکییەکانیش ڕوانین و بۆچونى خۆى لەبارەیانەوە ووتوە.
لەبارەى حوسنى موبارەکەوە نوسیویەتى، یەکێک بووە لەو سەرکردە بەساڵاچووە داپڵۆسێنەرانەى کە لە نێو کۆشکەکانیان بە دابڕواى لەگەلەکەیان ژیاون و بەرژەوەندى خۆیان خستووەتە پێش بەرژەوەندى گەلەکەیان ،بەو هۆیەشەوە داوایکردووە دەستلەکاربکێشێتەوە و خواست و داواکارییەکانى خۆپیشاندەرانى (25- یەنایەرى 2011) جێبەجێبکات.
لە بارەى شا عەبدوڵڵا عەبدولعەزیز ى شاى پێشووى سعودییەوە،نوسیویەتى "سەرسامى گرتمى کە بینیم 12 ژنى هەیە و جیاکارییەکى زۆریش لەنێوان هەردوو ڕەگەزدا دەکرێت ، توشى شۆک بووم ، ئەو ژمارە زۆرە لە منداڵ و نەوەى لەیەک کۆشکدا بەیەکەوە دەژین، ئۆباما لە شاى سعودییەى پرسیووە،دڵڕاگرتنى ئەو هەمووە لەلات چۆنە؟
 شا وەڵامى داوەتەوە، چارەسەرکردنى کێشە و ناکۆکییەکانى ئەمان، لە چارەسەرکردنى کێشەى رۆژهەڵاتى ناوەڕاست زۆر ئاڵۆزتر و سەختترە.

دەربارەی محەمەد بن زاید،جێنشینی ئەبوزەبی،دەڵێت زیرەکترین سیاسی  کەنداوە.

ئۆباما،باس لە لە بەهاری عەرەبی دەکات،دەڵێت هیچ کات نە پشتیوان و  نە دژایەتىم نەکردون،نەمویستووە لایەنگر دەربکەوم. تەنها ئەوەندە بووە لە وتارەکانمدا دەمگووت، کە پشتیوانى لە خواست و داواکارییەکانى گەلان دەکەم و دەبێت دەسەڵات خواست ویستى گەلەکانیان لەبەرچاو بگرن.
تەنانەت زۆر سەرسام بووە کە لەتونس شۆڕش هەڵگیرساوە ،دەڵێت  هەستم پێنەکردووە، کە گەلى تونس لە دەسەڵاتدارەکەیان بێزاربووبن و دەسەڵاتێکى نەخوازراویان هەبووبێـت.


باسی  بنیامین ناتانیاهۆ،سەرۆک وەزیرانی ئیسرائیلیشی کرددوە"سەرکردەیەکە کە جێگەى سەرسامییە ، زۆر خەمخۆرى گەلى یەهودیە و جووەکانى زۆر لامەبەستە "

سەبارەت بە جۆبایدنى، براوەى سەرۆکایەتى ئەمریکا نوسیویەتى، لەساتەوەختى ئەنجامدانى ئۆپەراسیۆنى بە ئامانجگرتنى ئوسامە بن لادنى سەرۆکى رێکخراوى تیرۆریستى (ئەلقاعیدە)، بەرهەڵستکار بووە، پێی باش نەبووە ئەو ئۆپەراسیۆنە ئەنجامبدرێت  و دەبێت زیاتر چاوەڕێ بکەن.

ئۆباما لە کتێبەکەیدا،فلادیمیر پۆتین،سەرۆکی ڕوسیای بە توند و زۆرزان و بێ سۆز ناوبردووە.
دەربارەی ئەنگێلا مێرکل،ڕاوێژکاری ئەڵمانیا،نوسیویەتی" جێگیر،ڕاستگۆ بە سروشتی خۆی نەرم بووە و توند بووە لە بیرکردنەوەدا   "

ئۆباما لە کتێبەکەیدا زۆر باسی کوردی نەکردوو،لە باسی سەردانێکی خۆی بۆ عێراق لە ساڵی ٢٠٠٩ دەڵێت " چەند پێشنیارێکم دایە نوری مالیکی،سەرۆک وەزیرانی ئەو کاتەی عێراق،بۆ نزیک بوونەوە لە سوننە و کورد،بەڵام ئەو باسی زۆرینەی شیعەی بۆ کردم،تێگەیشتم پرۆسەی دیموکراسی لە عێراق بە ئاسانی ناگاتە قۆناغێکی دڵخۆشکەر "


ئارام کۆکۆیی،یەکێکە لە ئەمریکا ناسەکان، بە کۆباسی گووت "کتێبەکەی بە پی دی ئێڤ و ئۆنلاین بڵاونەبووەتەوە،دیارە ئۆباما دەیەوێت قازانجی مادی لێبکات"
"لە بەرئەوە تاوەکو ئێستا نەمخوێندووەتەوە،بەڵام هەندێک ووتارم لە سەر کتێبەکە خوێندوەتەوە ، باسی کۆبانێی کردووە، هەرچەندە ئەردۆغانیش ڕەزامەند نەبووە،بەڵام ئەم گوێی پێنەداوە و هاوکاری بۆ ناردون".

گرافیک
زەوى بەڵێندراو، ٧٦٨ پەڕەیە، 3 ملیۆن کۆپى لێچاپکراوە ، وەرگێردراوەتە سەر 24 زمانى جیهانى، لە یەکەم ڕۆژی بڵاوکردنەوەی،لە ئەمریکا و کەنەدا ،890 هەزار کۆپى لە کتێبەکەی فرۆشراوە ، نرخى کتێبەکە 20 دۆلارە، واتە تەنها لە یەکەم ڕۆژی، نزیکەی ٢٠ ملیۆن دۆلاری دەست کەوتووە،چاوەڕێدەکرێت بۆ دوو ساڵى ئایندە ،زیاد لە ٢٥ بۆ ٣٠ ملیۆن کۆپی لێبفرۆشرێت و داهاتەکەی بگاتە نزیکای نیو ملیار دۆلار،داهاتێک زیاترە لەو مووچەیەی کە لە ماوەی ٨ ساڵەی سەرۆکایەتیەکەی وەریگرتووە.

no