هەواڵ- بیروڕا

ئەو بۆچونە زۆر راستە کە دەڵێت ئەگەر حکومەتی عێراق بریاریش بدا موچەی فەرمانبەرانی هەرێمی کوردستان راستەوخۆ دابەشبکات یان بينێرێت مانای ئەوە نيیە بێ داهاتی نەوت و ناوخۆی هەرێم ئەوە بکات، واتا لەهەموو حاڵەتێکدا بەغدا داوای داهاتەکان دەکات، واتا پابەندبونی هەرێم دیسان و بەبەردەوامی مەرجە.
واز لەوە بێنن کە ئایا هەوڵی ناردنی موچە بەشێوەی راستەوخۆ سەردەگرێت یان نا، (ئێمە لەساڵی ۲٠۱٦ هەوڵی جدیماندا سەری نەگرت) گریمان سەری نەگرت و نەکرا! بەڵام ئەوە هەر بەجدی دەسەڵاتدارانی هەرێم شەرم ناکەن و تەریق نابنەوە و خەجاڵەتی ناکێشن لەخۆیان، کە نیوەی ئەندامانی پەرلەمانی عێراق بەهۆی فەشەلی ئەوانەوە واژۆ لەسەر ئایندەی موچەی فەرمانبەرانی هەرێمی کوردستان دەکات ؟!
ئەوە شەرم ناکەن ڕوتان هەیە دەڵێن فڵان هەنگاو دەستورییە و فیسار هەنگاو دەستوری نیە ؟! گریمان ناردنی موچە راستەوخۆ دەستوری نیە؟ ئەی بڕینی موچە و برسیکردن و زەلیلکردنی فەرمانبەران دەستورییە ؟! ئەی دزینی داهاتی نەوت و ناوخۆی هەرێم دەستورییە ؟!
پاشان دوای ئەو هەموو ئابڕوچونە ئیدارییەتان، دوای ئەو هەموو فەشەلەتان لەحوکمڕانیی، کەی دەرس وەردەگرن ؟! دەبڕۆن رێککەون و بەشێک لەنەوت و داهات رادەستبکەن و پشکی هەرێم مسۆگەر بکەن و ببڕێتەوە.

هۆشیار عەبدوڵا
بەغدا
۲۱ ی نۆڤەمبەری ۲٠۲٠