هەواڵ- کوردستان

لە چەند پەیجێکی سۆشیال میدیاوە دەنگۆی ئەوە بڵاوبووەوە کە کچە بانگخوازێکی کوردی رۆژئاوا لە سلێمانی کوژراوە.
روداوەکە بە جۆرێک باس کراوە کە ئەو کچە خەڵکى رۆژئاواى کوردستانە و دوای مردنی باوک و دایکی لە رۆژئاوا هاتووەتە شارى سلێمانى و کارى بانگخوازى کردووەو بەبیانوى توندڕەوییەوە کوژراوە.
بەپێى هەواڵى ئەو پەیجانە کچەکە مەیسا مورتەزا ئەلحوسێنە و ساڵی 1991 لە شاری حومس لەدایک بووە و مامۆستا بوە له خولەکانی لەبەرکردنی قورئانی پیرۆز و چەند ساڵێکە هاتۆتە هەرێمى کوردستان و کارى بانگخوازى کردووە و  چەند ڕۆژێک لەمەوبەر لە یەکێک لە گوندەکانی پارێزگای سلێمانی لەلایەن 5 پیاوی دەمامکدارەوە بە چەقۆ کوژراوە..
کۆباس بەدواداچونى بۆ ئەو هەواڵە کرد و دەرکەوت هیچ شتێکى لەو جۆرە لە سنورى پارێزگاى سلێمانى روى نەداوە و ئەوەى بڵاوکراوەتەوە ناڕاستە و وەهمییە..

سەرکەوت ئەحمەد وتەبێژی پۆلیسی سلێمانی بە کۆباسى راگەیاند، “ئەو دەنگۆیانە ئەسڵ و ئەساسی نییەم تەحەدا دەکەم لە هیچ گوند و ناحیە و قەزایەکی سلێمانی و ناو سەنەتەری سلێمانی رووداوێکی لەو شێوەیە روویدابێت وو بڵاوکردنەوەى ئەو هەواڵانە تەنیا بۆ لێدانە لە ئەمنیەتی سلێمانی و هیچی دیکە.

ئەو پێگانەى ئەو هەواڵەیان بڵاوکردوەتەوە پشتیان بە هیچ سەرچاوەیەکى فەرمى نەبەستووە و سەرەتا لە پەیجێک ئەو هەواڵە بڵاوکراوەتەوە، دواتریش چەندین پەیجى دیکە کۆپیان کردووە و بڵاویان کردوەتەوە و چیرۆکیان بۆ داڕشتووە، بەڵام بە وتەى پۆلیسى سلێمانى هیچ شتێکى لەو بابەتە لە سلێمانى روى نەداوە..