هەواڵ- کوردستان

لەماوەی دوو ساڵی رابردوو ئەوەی یەکێتیی نیشتمانیی کوردستان کاری بۆ کردووە 
گەڕانەوەی شەرعیەتە بوو بۆ دامەزراوە یاساییەکانی هەرێمی کوردستان و 
بە مەرجەع کردنی خەڵکی کوردستان و پەرلەمانی کوردستان نەوەک 
حزب و لایەنی سیاسی و ئەوەش دۆخی هەرێمی کوردستانی 
بەرەو جۆرێک ئارامی بردووە و جگە لەوەش هەرێمی کوردستانی پاراستووە 
لەوەی حزبێک خۆی بکاتە بەخاوەنی هەموو دەستەکەوتەکان و 
بەپێی بەرژوەندییەکانی یاری بە چارەنوسی گەلێک بکات. 
لەتیف نێروەیی ئەندامی سەرکردایەتی یەکێتی و لێپرسراوی بۆردی راگەیاندن 
تایبەت بۆ کۆباس وتی، پەنابردنی یەکێتی بۆ ڕێگای یاسایی و دادگای فیدراڵی 
بۆ یەکلایی کردنەوەی کێشەکان ڕێگەیەکی سەردەمیانەیە و 
پێچەوانەی توندوتیژی زیان گەیاندنە بە بەرژەوەندییەکانی خەڵکی کوردستان و 
بەوەش دوای یەکێتی لایەنەکانی دیکە ئەو ڕێچکەیان گرتووەتە بەر 
کە رێچکەیەکی دروستە. 
ئاشکراشیکرد، هەرچەندە ناکۆکی و ململانێی نێوان لایەنەکان لە هەرێم بەردەوامی هەیە 
بەڵام دیاریکردنی ئەو رێچکە یاساییە لەلایەن یەکێتییەوە 
دۆخەکەی ئارامتر کردووەتەوە و بەراورد بە پێشووتر.  
باسی لەوەشکرد، یەکێتی لە داهاتوو بەردەوامی بەم رێچکەیەی دەدات و 
سازشیش لەسەر داوا یاساییەکانی ناکات بۆ بەرژوەندی خەڵکی کوردستان و 
هەرکاتیش پێویست بکات و بزانرێت کێشەکان بە دانوستان و گفتوگۆ چارەسەر نابێت 
پەنا دەباتەوە بەر یاساو دادگا.
زۆرجار لە رێگەی نیگەرانی و گلەییەکانی ئەو لایەنەی دەیوست بە عینادی سیاسی 
دۆخی هەرێم لەبەرژوەندی خۆی بەکاربهێنێت 
یەکێتی تۆمەتبار دەکات بە دواخستنی هەڵبژاردن و 
هۆکاری بردنە دەرەوەی کێشەکانی هەرێمی کوردستان 
یەکێتی بۆ ئەمەش وەڵامی خۆی بە بەڵگەوە ئاشکرا دەکات و 
لایەنی  کەمتەرخەم بۆ خەڵکی کوردستان ئاشکرا دەکات. 
رۆژان محەمەد کەریم ئەندامی لیژنەی یاسایی 
لە خولی پێشووی پەرلەمانی کوردستان تایبەت بۆ کۆباس وتی، 
وەکو فراکسیۆنی یەکێتی لە پەرلەمانی کوردستان 
پێش ئەوەی پەرلەمانی کوردستان لەکاربخرێت داوامانکرد بە سازان و گفتوگۆ 
هەمواری یاسای هەڵبژاردن بکرێت و 
ئەو یاسا کۆنەی کاری پێدەکرێت و لەجیهان لەکار خراوە گۆڕانکاری تێدا بکرێت و 
هەرێمی کوردستان لە یەک بازنەیی هەڵبژاردن بکرێتە چەند بازنەیەک و 
کورسی پێکهاتەکان بدرێتەوە پێکهاتەکان خۆیان و 
بەسەر پارێزگاکان دابەش بکرێت 
بەڵام عینادی سیاسی پارتی وایکرد ئەم دۆخە لە کوردستان دروست ببێت و 
پەرلەمانی کوردستان لەکار بخرێت، 
هەر خۆشی یەکەم لایەن بوو لە پەرلەمان پابەندی بڕیارەکەی دادگای فیدراڵی بوو 
بۆ لەکارخستنی پەرلەمانی کوردستان. 
ئەوەشی وت، پەنابردنی یەکێتی بۆ دادگای فیدراڵی یەکێک بوو لەو بژاردە سەردەمییانەی 
کە پێویست بوو بکرێت و چیتر دۆخی هەرێم مەترسی نەکەوێتەسەر. 
لەبارەی بەرنامەی کاری یەکێتی بۆ داهاتوو ئەو شۆڕشەی بەرپای کردووە 
بۆچی لایەنەکانی دیکە زووتر کاریان لەسەر نەکردووە؟ 
دەوترێت تەنها یەکێتی خۆی بە خاوەنی دەنگی خەڵکی کوردستان دەزانێت و 
بوێری ئەوەی هەبووە خەڵکی کوردستان لەو دۆخە چەق بەستووە سیاسییە دەرباز بکات. 
د. رێبوار محەمەد مامۆستای زانکۆ و یاساناس تایبەت بۆ کۆباس وتی، 
ئەم شۆڕشە یاساییە تەنها بە یەکێتی دەکرا و ئامانجی سەرەکیشی بریتیی بوو 
لە گەڕانەوەی شەرعیەتی دەسەڵات بۆ دامەزراوەکان لەسەر بنەمای یاساییەک  
کە دادپەروەری هەڵبژاردنی تێدا ڕەچاوکرابێت و 
دەرفەتی یەکسان بۆ هەمووان فەراهەم بکات. 
باسی لەوەشکرد، ئامانجێکی تری ئەم شۆڕشە یاساییە کۆتاییهێنانە بە مەرجەع کردنی حزب و 
کەسەکان و لەبری ئەوە بۆی گرنگە خەڵکی کوردستان و پەرلەمانی کوردستان مەرجەع بن.
ئەو مامۆستایەی زانکۆ ئاشکراشیدەکات، ئەم شۆڕش یاساییە 
بە مکوڕیی یەکێتی و یەک دەنگی و یەک بڕیاری سەرکەوتوو بووە و 
دواتریش بە بڕیاری دادگای فیدراڵی و دەستەی دادوەری هەڵبژاردن 
بە پەسەند وەسف کراوە.